پنجاب میں پہلی مرتبہ دیہی خواتین کیلئے خصوصی بسیں چلانے کا فیصلہ
لاہور(پی ایم این/خالدمحمود )ملک کے سب سے بڑے صوبے پنجاب میں دیہی خواتین کی سفری سہولیات کیلئے پنجاب حکومت نے خصوصی بسیں چلانے کافیصلہ کرلیا۔
اس حوالے سے وزیراعلیٰ پنجاب مریم نواز نے دیہی خواتین کی ٹرانسپورٹیشن کیلئے انٹر ویلیج ٹرانسپورٹ کا جامع پلان طلب کرلیا اور دور دراز اضلاع میں مرحلہ وار 25 بسوں پر مشتمل ماس ٹرانزٹ سسٹم شروع کرنے کی تجویز کا جائزہ لیا۔
وزیراعلٰی کی ہدایت پرپنجاب کا پہلا وومن ٹرانسپورٹ سیلوشن پلان تیار کیا جائے گا اور ہر دیہی تحصیل سے ڈسٹرکٹ ہیڈ کوارٹر تک بس سروس شروع کی جائے گی۔
یہی نہیں وزیراعلٰی پنجاب نےماس ٹرانزٹ سسٹم میں خواتین مسافروں کو سبسڈی دینے کیلئے فوری اقدامات کی ہدایت دی۔
مریم نواز نے اس موقع پر کہا کہ جدید ٹرانسپورٹ سسٹم دیہات میں رہنے والی خواتین کا بھی حق ہے، دیہی خواتین کے لیے ٹرانسپورٹ کا نظام نہ ہونا انتہائی تکلیف دہ ہے، اس سے طالبات اور مریض خواتین کو آمد ورفت میں آسانی ہوگی