عوامی مسائل کے حل کیلئے وفاق کی حمایت کا فیصلہ کیا: بلاول بھٹو
گڑھی خدا بخش :(پی ایم این) پاکستان پیپلز پارٹی کے چیئرمین بلاول بھٹو زرداری نے کہا ہے کہ عوامی مسائل کا حل ترجیح ہے،عوامی مسائل کے حل کے لیے وفاقی حکومت کی حمایت کا فیصلہ کیا۔
بلاول بھٹو نے اپنے نانا، سابق وزیر اعظم اور بانی پیپلز پارٹی ذوالفقار بھٹو کی برسی کے موقع پر منعقدہ تقریب سے خطاب کرتے ہوئے کہا کہ شہید بھٹوکا عدالتی قتل کیا گیا تھا،رمضان کےبعد گڑھی خدابخش میں جلسہ کریں گے۔
ان کا کہنا تھا کہ عدالتی نظام میں اصلاحات کی طرف آگے بڑھنا پڑے گا، صوبائی سطح پر کسان کارڈ متعارت کرائیں گے، حکومت کو وقت دیا گیا تو پاکستان کو معاشی بحران سے نکالا جائے گا۔
قبل ازیں بلاول بھٹو اپنے نانا، سابق وزیر اعظم اور بانی پیپلز پارٹی ذوالفقار بھٹو کی برسی کے موقع پر گڑھی خدا بخش پہنچے جہاں انہوں نے اپنے نانا اور والدہ سمیت دیگر شہدا کے مزارات پر حاضری دی اور پھول چڑھائے۔
اس موقع پر پیپلزپارٹی شعبہ خواتین کی مرکزی صدر فریال تالپور ، وزیراعلیٰ سندھ مراد علی شاہ، صوبائی وزرا اور ارکان اسمبلی نے بھی بلاول بھٹو کے ساتھ حاضری دی۔