تربیلا اور منگلا ڈیم ڈیڈ لیول کے قریب، پانی کی قلت کا خدشہ
اسلام آباد(یاسین مغل سے پی ایم این)انڈس ریور سسٹم اتھارٹی (ارسا) نے خبردار کیا ہے کہ ملک کے دو بڑے ڈیم، تربیلا اور منگلا، اپنے ڈیڈ لیول کے قریب پہنچ چکے ہیں، جس کے باعث پانی کی قلت میں مزید اضافے کا امکان ہے۔
ارسا کی جانب سے جاری کردہ مراسلے میں بتایا گیا ہے کہ ربیع سیزن کے باقی عرصے میں پانی کی دستیابی میں 30 سے 35 فیصد کمی ہوسکتی ہے۔ اس صورتِ حال کے پیش نظر صوبائی محکمہ آبپاشی کو فوری اقدامات کرنے کی ہدایت کی گئی ہے۔
پانی کی موجودہ صورتحال
ارسا کے مطابق، پنجاب نے رواں ربیع سیزن میں 20 فیصد اور سندھ نے 16 فیصد پانی کی کمی برداشت کی ہے۔ موجودہ پانی کی تقسیم کچھ یوں ہے:
- سندھ کو 27 ہزار کیوسک کی طلب کے مقابلے میں 25 ہزار کیوسک پانی فراہم کیا جا رہا ہے۔
- پنجاب کو 45 ہزار کیوسک طلب کے مقابلے میں 40 ہزار کیوسک پانی مل رہا ہے۔
ترجمان ارسا کا کہنا ہے کہ اگر بارشیں نہ ہوئیں تو تربیلا اور منگلا ڈیم اگلے تین سے چار روز میں ڈیڈ لیول تک پہنچ سکتے ہیں، جو پانی کی فراہمی اور زراعت کے لیے خطرناک ثابت ہوسکتا ہے۔
ڈیمز کی سطح
واپڈا کے مطابق:
- تربیلا ڈیم کا ڈیڈ لیول 1402 فٹ ہے، جبکہ موجودہ پانی کی سطح 1409.50 فٹ ہے۔
- منگلا ڈیم کا ڈیڈ لیول 1050 فٹ ہے، جبکہ موجودہ سطح 1088.45 فٹ ریکارڈ کی گئی ہے۔
ماہرین کا کہنا ہے کہ بارشوں کے بغیر پانی کی قلت برقرار رہ سکتی ہے، جس کے اثرات زرعی پیداوار اور بجلی کی پیداوار پر بھی پڑ سکتے ہیں۔