چیف جسٹس پاکستان جسٹس یحییٰ آفریدی نے "اینٹی کرپشن ہاٹ لائن” قائم کر دی

سپریم کورٹ کی جانب سے جاری اعلامیے کے مطابق، چیف جسٹس یحییٰ آفریدی نے عدلیہ میں احتساب کے عمل کو مزید موثر بنانے اور عوام کو فوری انصاف کی فراہمی میں حائل رکاوٹوں کو دور کرنے کے لیے "اینٹی کرپشن ہاٹ لائن” کا آغاز کیا ہے۔ یہ اقدام ایک بدعنوانی سے پاک ماحول کی تخلیق کے لیے اٹھایا گیا ہے۔

چیف جسٹس یحییٰ آفریدی نے اپنے پیغام میں کہا کہ سپریم کورٹ میں تیز ترین انصاف کی فراہمی ان کی اولین ترجیح ہے۔ انہوں نے بتایا کہ گزشتہ پانچ ماہ کے دوران 7633 نئے کیسز دائر ہونے کے باوجود 11779 کیسز کا فیصلہ کیا گیا۔ ان کا کہنا تھا کہ نئے ججز کی تعیناتی کے بعد مقدمات کے فیصلوں میں مزید تیزی آئے گی اور ہر مقدمہ جلد اور میرٹ کی بنیاد پر فیصل کیا جائے گا۔

چیف جسٹس نے عوام کو مخاطب کرتے ہوئے کہا کہ اگر کسی بھی شخص کی جانب سے رشوت یا سفارش کا مطالبہ کیا جائے تو فوراً اطلاع دیں۔ انہوں نے یہ بھی یقین دلایا کہ شکایت دہندگان کی شناخت خفیہ رکھی جائے گی اور شکایات پر فوری کارروائی کی جائے گی۔

سپریم کورٹ اینٹی کرپشن ہاٹ لائن کا نمبر 03264442444 ہے، جس پر 24 گھنٹے شکایات درج کی جا سکتی ہیں۔