ڈیرہ اسماعیل خان میں سکیورٹی فورسز کا کامیاب آپریشن، 10 خوارج ہلاک، کیپٹن حسنین اختر شہید
ڈیرہ اسماعیل خان: سکیورٹی فورسز نے ڈیرہ اسماعیل خان میں خفیہ اطلاعات پر آپریشن کیا جس کے دوران 10 خوارج ہلاک ہوگئے، جب کہ دہشت گردوں کی فائرنگ سے پاک فوج کے بہادر افسر کیپٹن حسنین اختر شہید ہوگئے۔
آئی ایس پی آر کے مطابق، آپریشن کے دوران ہلاک ہونے والے دہشت گرد متعدد دہشت گرد کارروائیوں اور بے گناہ شہریوں کی ٹارگٹ کلنگ میں ملوث تھے۔ فورسز نے دہشت گردوں سے بھاری مقدار میں ہتھیار اور گولہ بارود بھی برآمد کیا ہے۔
آپریشن کے دوران کیپٹن حسنین اختر شہید ہوگئے، جن کا تعلق ضلع جہلم سے تھا۔ وہ چار سال سے وطن کے دفاع کی خدمت سرانجام دے رہے تھے۔ شہید نے اپنے پیچھے والدین اور بہن بھائیوں کو سوگوار چھوڑا ہے۔
آئی ایس پی آر کا کہنا ہے کہ علاقے میں مزید ممکنہ خوارج کے خاتمے کے لیے کلیئرنس آپریشن جاری ہے۔