بلوچستان میں انتظامی بحران کے خاتمے کے لئے ایف آئی اے سندھ زون سے 10 افسران کا تبادلہ

بلوچستان میں انتظامی بحران کے حل کے لئے ایف آئی اے نے سندھ زون سے 10 افسران کا بلوچستان تبادلہ کر دیا ہے۔ ہیڈکوارٹر اسلام آباد سے جاری مراسلے میں کہا گیا ہے کہ بلوچستان میں آپریشنل ڈیمانڈ کی وجہ سے تمام رینک کے افسران کی کمی ہے، اور ایف آئی اے بلوچستان کی اہم ذمہ داریوں کو مؤثر بنانے کے لئے فوری تبادلوں کی ہدایت کی گئی ہے۔

ایف آئی اے کے اے ڈی جی ساؤتھ آفس کی جانب سے جاری نوٹیفکیشن میں کہا گیا ہے کہ سندھ کے کراچی زون سے اے ڈی شاہد سعید، انسپکٹر نازیہ سلیم، خرم اسلام، راجہ سنیل، منیر باجکانی اور کامبوہ خان کا تبادلہ بلوچستان کردیا گیا ہے۔ اسی طرح حیدرآباد زون سے ذوالفقار علی سیال، صائمہ صدیق، سرفراز حسین اور وقار احمد بھی بلوچستان روانہ کیے گئے ہیں۔

ایف آئی اے حکام کے مطابق، ہیڈکوارٹر سے موصول تازہ احکامات کے تحت مزید 24 افسران اور اہلکاروں کا بلوچستان تبادلہ کرنے کی فہرست تیار کی جارہی ہے۔ ان میں 2 اسسٹنٹ ڈائریکٹرز، 6 انسپکٹرز، 6 سب انسپکٹرز اور 10 کانسٹیبل شامل ہیں، جنہیں فوری طور پر بلوچستان بھیجا جائے گا۔

ذرائع کے مطابق ایف آئی اے سندھ زون میں پہلے ہی افسران کی شدید کمی کا سامنا ہے، اور تازہ تبادلے سے انتظامی بحران مزید پیچیدہ ہو سکتا ہے۔