کراچی میں واٹر ٹینکر کی ٹکر سے میاں بیوی جاں بحق، نومولود بھی زندگی کی بازی ہار گیا
کراچی: کراچی کے علاقے ملیر ہالٹ کے قریب ایک افسوسناک حادثے میں واٹر ٹینکر کی ٹکر سے حاملہ خاتون اور ان کے شوہر جاں بحق ہوگئے۔ حادثے کے نتیجے میں خاتون کے پیٹ میں موجود نومولود بچہ بھی دم توڑ گیا۔
ریسکیو ذرائع کے مطابق یہ واقعہ ملیر ہالٹ کے قریب پیش آیا، جہاں ایک تیز رفتار واٹر ٹینکر نے موٹر سائیکل سوار میاں بیوی کو کچل دیا۔ پولیس کے مطابق خاتون حاملہ تھی اور اس نے زخمی حالت میں بچے کو جنم دیا، تاہم بچے کی زندگی نہ بچ سکی۔
پولیس نے واقعے کے فوراً بعد واٹر ٹینکر کے ڈرائیور کو گرفتار کر لیا اور ٹینکر کو تحویل میں لے لیا۔ ابتدائی تحقیقات سے معلوم ہوا ہے کہ حادثہ ممکنہ طور پر واٹر ٹینکر کے بریک فیل ہونے کی وجہ سے پیش آیا۔
پولیس کا کہنا ہے کہ واٹر ٹینکر ہائی وے کی جانب سے آ رہا تھا اور ملیر ہالٹ پل کے نیچے سے تیز رفتار میں شارع فیصل کی طرف بڑھا، جس کے نتیجے میں موٹر سائیکل سوار میاں بیوی اس کی زد میں آ گئے۔